Eenmalige betalings vir droogtehulp in W.Kaap

'n Eenmalige uitbetaling vir kleinskaalse boere en plaaswerkers wat weens die droogte van twee jaar in streke in die Wes-Kaap hul inkomste kwyt is, kan aansoek doen om droogtehulp. Aansoeke om die eenmalige bedrag van R900 kan nog tot 10 September in verskeie dorpe gedoen word.

Mense wat daarvoor in aanmerking kom, moet 'n vorm voltooi wat deur die Nasionale Ramphulpfonds verskaf word. Die raad van hierdie fonds sal die aansoeke oorweeg en teen November bystandgeld aan die suksesvolle aansoekers betaal.

Vaste of seisoenale werkers op plase wat hul werk weens die droogte verloor het, plaaswerkers wie se inkomste verminder het, asook diegene wat die vooruitsig van voortgesette werk op die plaas kwyt is, kom in aanmerking vir hulp. Plaaswerkers wat 'n alternatiewe inkomste gehad het of nog kry, kan nie in aanmerking kom nie — ook nie plaaswerkers wat op 'n daaglikse grondslag in diens is nie.

Mense en huishoudings wat uitsluitlik op 'n inkomste van werkverskaffingsprojekte in die landbou afhanklik is en deur die droogte benadeel is, kan wel aansoek doen. Verder kan bestaans- en opkomende boere in aanmerking kom. Meertallige gesinne wat op 'n plaas werk en 'n huis deel, kwalifiseer as afsonderlike huishoudings.

Kommersiële boere, bestaans- en opkomende boere en ander mense wat droogtehulp van ander staatsdepartemente of agentskappe ontvang, kan nie aansoek doen nie, ook nie mense met 'n alternatiewe inkomste, vaste inkomste en diegene wat 'n maatskaplike toelaag ontvang nie.

Mense wat 'n toelaag vir 'n kind of pleegkind ontvang, word egter nie uitgesluit nie.

Diegene wat daarvoor in aanmerking kom, kan die op volgende datums aansoek doen: 5 en 7 September (Bergrivier), 8 en 9 September (Saldanha), 10 September (Swartland), 5 September (Laingsburg en Touwsrivier), 6 September (Merweville en Tulbagh), 5 en 6 September (Worcester), 7 September (Wolseley) en 9 of 11 September (Citrusdal).

Skakel die Wes-Kaapse departement van landbou se tolvrye nommer 0800 204 378 vir meer inligting.

9 September 2005