Eienaarskap-oordrag nodig

Groter eienaarskap-oordrag is nodig om transformasie in Suid-Afrika te laat slaag.
Mnr. Vic van Vuuren van Besigheid Eenheid SA (Busa) het op Agri SA se kongres in Kimberley gewaarsku dat gelyke indiensneming nie voldoende is om die gaping tussen voorheen benadeelde mense en bevoordeelde mense betekenisvol te laat kwyn nie. Eienaarskap moet ook van wit na swart mense oorgedra word.

"Ná 20 jaar van demokrasie is die sake-omgewing in Zimbabwe steeds heeltemal gepolariseerd — met swart sakelui aan die een kant, en wit aan die ander kant," het Van Vuuren gesê.

"Daar is nog net gelyke indiensneming bewerkstellig en amper geen eienaarskap-oordrag het al plaasgevind nie. Die gaping tussen bevoordeelde mense en benadeeldes is nog nooit verklein nie."
Volgens hom is ook nog bitter min eienaarskap in die eerste tien jaar van demokrasie in Suid-Afrika oorgedra. &Quqot;Die uitdaging is om dié probleem in die komende paar jaar uit te stryk. As ons nie in die volgende tien jaar die regte dinge doen nie, gaan transformasie hier ook tot stilstand kom," het Van Vuuren gesê.

Hy het bygevoeg dat ekonomiese groei nie die enigste dryfveer vir besigheid in Suid-Afrika is nie. "Transformasie is ook nodig.

"Ekonomies gaan dit goed met Suid-Afrika. Die breë ekonomiese beleid is gunstig, inflasie is af en produktiwiteit is op. Daarom is die ekonomiese klimaat nie sleg om in sake te doen nie. In die werklikheid moet egter ook met ongelykheidskwessies rekening gehou word, soos in onderwys, op sosiale vlak en wat eienaarskap betref. Dit gaan nie net oor ekonomiese groei en ekonomiese beginsels nie."

Van Vuuren het gewaarsku dat die georganiseerde landbou die inisiatief met die opstel van 'n bemagtigingshandves vir die bedryf (die AgriSEB-handves) moet neem, en dit nie net aan die minister moet oorlaat nie.

In die gesondheidsektor word dié proses deur die minister gehanteer "en daar gaan dit glad nie goed nie. "Dit is baie beter as die dryfkrag uit die bedryf self kom.?"

Van Vuuren het Agri SA gelukgewens met die manier waarop hy in dié proses vroegtydig optree.

25 Oktober 2005