Ekonomie: Landbou gee hupstoot

Die land se ekonomie het in die tweede kwartaal van vanjaar met 4,8 % gegroei vergeleke met die eerste kwartaal van vanjaar. Daarvan het die landbou met 0,3 % bygedra.

Die jongste syfers van Statistieke Suid-Afrika (SSA) oor die bruto binnelandse produk (BBP) is verlede week in Pretoria bekend gemaak. Daarvolgens was die produksie van die landbou saam met bosbou en vissery 10,1 % meer in die tweede kwartaal.

Me. Kedibone Mokone, hoofekonoom in die BBP-afdeling by SSA, sê dit is tans moeilik om te sê wat die landbou se presiese aandeel in die groei van 10,1 % is. Sy sê syfers oor spesifiek die landbou se ekonomiese groei word eers teen die einde van die jaar met die jaarlikse BBP-syfers bekend gemaak.

Sy sê die tweede kwartaal verteenwoordig egter die tydperk April tot Junie. Dit is in dié tyd wat uitset 'n oplewing toon aangesien somergraan gewoonlik geoes word. Mokone sê produksie word as maatstaf vir die bepaling van die BBP gebruik.

Volgens mnr. Johan Pienaar, direkteur van ekonomie en handel by Agri SA, is een verklaring vir die groei van 10,1 % die feit dat boere wel graan vroeg gelewer het, ondanks die lae graanpryse. 'n Bykomende verduideliking is moontlik die rekordmielie-oes.

Daarenteen toon die jongste vertrouensindeks van die Landboubesigheidskamer (LBK) dat lae boerepryse en die sterker rand sakevertroue in die landbou steeds laat daal. "Boere se besteebare inkomste en koopkrag is onder druk weens produsentepryse wat steeds laer neig. Landbou-ondernemings se verwagtinge oor 'n toename in omset en netto bedryfsinkomste is onderskeidelik 20,46 % en 41,25 % laer as in die derde kwartaal van 2004," lui 'n verklaring van die LBK.

2 September 2005