Etanol-aanleg nog op koers

Alles is nog op koers om die eerste groot aanleg om etanol uit mielies te vervaardig, teen Julie aanstaande jaar by Bothaville in werking te hê, sê mnr. Johan Hoffman, uitvoerende hoof van Ethanol Africa.

Hy het in antwoord op vrae op 'n konferensie oor biobrandstof in Boksburg oor die vordering met die aanleg gesê die bedrywighede staan geensins stil nie. Hoewel die voorbereiding van die terrein in Desember afgehandel is, is daar nog gewerk aan die aanleg se ontwerp omdat dit uniek in Suid-Afrika sal wees.

"Ons moes ook kies of ons die aanleg self moet bou en die risiko's dra en of ons vir 'n vastepryskontrak met minder risiko's moet gaan. Eers toe die aanleg se ontwerp 99 % voltooi was, kon ons buitelandse ondernemings vra om vir 'n vastepryskontrak te kwoteer. Ons sal teen einde Maart op 'n kontrakteur kan besluit."

Hy sê afgesien van bestaande beleggings en die swart ekonomiese bemagtigingstransaksie vir 25 % van die maatskappy se aandele met 'n konsortium onder leiding van oudminister Valli Moosa wat onlangs beklink is, is gesprekke met nóg beleggers in die buiteland en plaaslik "in 'n finale stadium".

Hoffman sê die skerp styging in die prys van staal is ook in hul finansiële berekeninge in ag geneem. Hulle verwag 'n interne opbrengskoers (IRR) van 34 %. Dit is gegrond op 'n kapitaalbesteding van R1 miljard (die beraamde prys van die aanleg is R920 miljoen teenoor die aanvanklike R700 miljoen), 'n prys vir mielies van R1 100 per ton in die boer se sak en 'n basiese brandstofprys van R3,15 per liter. Hy wys daarop dat 'n boer wat sy mielies op Safex verkoop, sowat R200 per ton aan die liggingsdifferensiaal en ander koste afstaan.

Hoffman sê met die uitsondering van Brasilië is Afrika dié vasteland met die vermoë om die wêreld van biobrandstof te voorsien. Net in Suider-Afrika is daar meer as 126 miljoen hektaar bewerkbare grond vir die verbouing van mielies beskikbaar, waarvan baie min benut word. In Angola word 3 % van 30 miljoen hektaar benut, in Mosambiek 10 % van 18 miljoen hektaar, in Zambië 15 % van 25 miljoen hektaar, in Tanzanië 4,2 % van 40 miljoen hektaar en in Suid-Afrika 60 % van 5 miljoen hektaar.

Landbouweekblad, 9 Maart 2007