'Gebruik hawens eerder as koring-basis'

Randfontein as basis vir die verhandeling van koring behoort verander te word sodat die verskillende hawens in die land as verhandelingspunt dien.

Mnr. Hermanus Kitshoff, koringboer van die winterreënstreek in die Wes-Kaap, het op die koringbesprekingsessie op die kongres voorgestel 'n alternatiewe prysvormingsmeganisme moet "dringend" onderhandel word. "Randfontein word as verhandelingspunt gebruik, met die gevolg dat alle plaaslik geproduseerde koring se pryse afgelei word asof dit te Randfontein gelewer en gemaal word."

Kitshoff sê die beperking vir die koringboer is dat prysafleiding plaasvind asof Randfontein die enigste mark in die land is. "Suid-Afrika is 'n netto-invoerder van koring en daarom het dit sin dat die verhandelingsplek vir koring die Suid-Afrikaanse hawens moet wees," het hy gesê. Die jaarlikse kommersiële vraag na koring word op 2,9 miljoen ton bereken, terwyl die Oesskattingskomitee produksie vir 2005/06 op 1,8 miljoen ton raam.

"Die hawens vorm die basis van in- én uitvoerpariteit". Die bykomende voordeel wat hieruit kan voortspruit, is dat die termynmark van die fisieke mark vir koring geskei word.

"In lande soos Amerika verhandel die fisieke mark en die termynmark as aparte markmeganismes. Die termynmark word gebruik om prysrisiko te bestuur, terwyl die fisieke mark gebruik word om koring te lewer en te verkoop. In Suid-Afrika is die termynmark en die fisieke mark tans een," het hy gesê.

Kitshoff meen as die hawens as verwysingspunt vir verhandeling gebruik word, word elke meul in Suid-Afrika 'n koper van koring in die fisieke mark in teenstelling met slegs Randfontein in die huidige bedeling. " 'n Natuurlike skeiding tussen die fisieke mark en die termynmark kan só ontstaan."

Mnr. Charles Wessels, ook van die Wes-Kaap, sê boere moet onthou 'n "ander dinamiek" bepaal die koringprys. Hy sê markkragte, soos vraag en aanbod, is nie werklik by koring ter sprake nie omdat daar slegs vier kopers van koring op Safex, die termynmark, is.

24 Maart 2006