'Geldkrisis hier om te bly'

Die krisis waarin die wêreldekonomie hom bevind, is nog lank nie verby nie. Die uitwerking daarvan sal nog 'n geruime tyd deur die plaaslike ekonomie ondervind word.

Dr. Pieter Taljaard, landbouekonoom van die Universiteit van die Vrystaat, sê 'n voorbeeld daarvan is 'n afname in die koopkrag van verbruikers wat steeds minder besteebare geld vir luukse produkte het. Hy het op die Vrystaatse kongres van die Nasionale Wolkwekersvereniging (NWKV) in Bloemfontein gesê dit voorspel slegte nuus vir sekere landboubedrywe waarvan die produkte, soos sekere snitte rooivleis, as luuks beskou kan word.

Taljaard sê met die verbruiksbesteding onder druk en die binnelandse vraag na landboukommoditeite wat stagneer, is die kans skraal op hoër pryse. Die uitvoer na Europa en Asië is ook heelwat swakker weens die gedempte vraag na verbruikersgoedere.

Weens die gedempte vraag wêreldwyd, kan uitvoerprodukte op markte gestort word, soos rooivleis uit Rusland. Die gevolg daarvan is dat plaaslike pryse benadeel gaan word.

Lees meer in Landbouweekblad se uitgawe van 20 Maart 2009.

19 Maart 2009