Gilde wil jag beter bevorder

'n Afrika-jagtersgilde met die oogmerk om 'n groter persentasie van die wêreld se sowat 35 miljoen aktiewe jagters na Suider-Afrika te lok, is in Pretoria bekend gestel.

Die gilde is bestempel as 'n nis-vereniging waaraan jag-entoesiaste van die wêreld en uitgesoekte jagondernemings in lande in Suider-Afrika kan behoort.

Deur gekoördineerde bemarking en 'n webwerf sal die room van jagbestemmings aan dié jagters bekendgestel word.

In sy aanbieding het mnr. Pieter Viljoen, besturende direkteur van die gilde, gesê die getal buitelandse jagters wat hierheen kom, groei nie noemenswaardig nie omdat gefragmenteerde bemarking gedoen word.

Mnr. André van Schalkwyk, direkteur van navorsing en produkontwikkeling, sê die gilde is uniek geplaas om die nodige gemoedsrus aan buitelandse jagters te gee en te verseker dat elkeen 'n ervaring het wat aan sy verwagtinge voldoen.

In die mededingende omgewing sukkel jagondernemings eweneens om hul wild, geriewe en dienste doeltreffend te bemark omdat hulle hul kollektiewe mededinging grootliks verloor het. Hulle ding inderwaarheid hoofsaaklik teen mekaar in die internasionale mark mee.

Die gilde sal aan die jagter en die ondernemer die geleentheid bied om deur gekoördineerde bemarking en 'n omvattende rekenaardiens maklik by mekaar uit te kom sodat die jagter sy bestemming maklik kan kies en die ondernemer sy produk beter kan bekend stel en bemark.

Op die manier wil die Gilde verseker dat Suider-Afrikaanse wildboere 'n groter deel as die huidige 0,5 % van die wêreld se jagters kan lok om meer te kom bestee as die sowat R900 miljoen wat verlede jaar deur buitelandse jagters uitgegee is.

Buitelandse sowel as plaaslike jagters en diensverskaffers wat aan die hoë vereistes van die gilde voldoen, sal daarby kan aansluit.

3 Desember 2004