'G'n inmenging met oesskattings'

Die Oesskattingskomitee het verlede week bewerings ontken dat politieke inmengery sy ramings van die mielie-oes beïnvloed.

Verskeie belanghebbendes in die graanbedryf het vanweë die komitee se hoë skatting van die mielie-oes gevra of daar in die oesskatting ingemeng word. Die kommer bestaan in sommige kringe dat die komitee met die huidige swak toestande die oes hoër wil skat om verdere skokke in die graanmark en vir voedselinflasie te keer. Dit sou beteken dat die algehele inflasie-prentjie verder versteur word met die Reserwebank wat genoop word om rentekoerse te lig.

In sy jongste skatting sê die komitee hy verwag 'n kommersiële mielie-oes van 6,9 miljoen ton.

Sommige betrokkenes meen produksietoestande het die afgelope drie maande só verswak weens die afwesigheid van goeie wydverspreide reën, dat die oes waarskynlik kleiner is.

Mnr. Rodney Dredge, voorsitter van die komitee, het dit kategories teenoor Landbouweekblad gestel dat daar nie by die komitee ingemeng word nie. "Definitief nie — ons neem nie ander faktore in ag afgesien van produksie- en weersomstandighede nie. Daar is geen politiek betrokke nie en daar het nog nooit amptenare óf die minister vir ons voorgeskryf nie. Ook nie die Landboubemarkingsraad, wat met voedselpryse werk nie, en ook nie die Reserwebank nie. Daar word ook geen riglyne vir ons neergelê nie."

Me. Rona Beukes, lid van die komitee, het by navraag gesê die komitee volstaan by sy skatting. "Dit is 'n konsensusbesluit ná al die inligting op die tafel deeglik beredeneer is. Ons voel gemaklik met die syfer," het sy gesê.

Me. Annatjie Loio, voorsitter van die Graanhanteringsorganisasie van Suider-Afrika, sê haar grootste bekommernis is dat die land waarskynlik heelwat meer mielies sal moet invoer — iets waarvoor tans nie planne beraam word nie. (Lees meer hieroor op bl. 109)

Mnr. Pieter van Schalkwyk, handelaar by UT Grain Management, sê die prysdaling van twee dae met R45 elk was die grootste daling in die laaste klompie weke. Hy het gesê hy skryf dit in 'n minder mate toe aan die reën, en meer aan die skatting. Van Schalkwyk het gesê hy het 'n skatting van tussen 6,5 miljoen ton en 6,7 miljoen ton verwag.

Landbouweekblad, 6 April 2007