Goeie kans op lentere

Daar bestaan 'n 50 % moontlikheid dat 'n swak El Niño-verskynsel sy invloed in die komende somerreënseisoen kan laat geld. Dit kan tot vroeg volgende jaar voortduur.

Die meeste modelle van die Suid-Afrikaanse Weerdiens stem saam oor 'n groot moontlikheid van onder-normale reënval oor die sentrale en westelike deel. Daar is egter 'n effe gunstiger voorspelling vir die noord-oostelike deel van die voorspellingsstreek. In die algemeen word hoë gemiddelde temperature voorspel.

Volgens die weerdiens se jongste seisoensverslag vir Suider-Afrika is daar 'n klein kans op 'n gunstige somerreënseisoen.

Die see-oppervlaktemperature in die suidelike Indiese Oseaan en die suidelike Atlantiese Oseaan ondersteun egter gunstige reënvaltoestande in die oostelike deel van Suid-Afrika en die suidelike deel van Mosambiek.

In Oktober, November en Desember word gunstige reënvaltoestande vir die hele voorspellingsgebied voorsien. Groter moontlikhede vir naby-normale reënvaltoestande is meer waarskynlik met 'n 40 % kans op onder-normale reënvaltoestande. 'n Bo-normale reënseisoen vir hierdie drie maande is meer waarskynlik as 'n onder-normale reënvalseisoen.

In Desember, Januarie en Februarie verhoog die moontlikheid vir 'n onder-normale reënvalseisoen vir die grootste deel van die voorspellingsgebied, terwyl naby-normale reënvaltoestande meer waarskynlik is vir die noord-oostelike deel van Suid-Afrika en die oostelike deel van Botswana. Volgens die voorspellingsmodelle sal die voorspelde bo-normale reënvalseisoen van die vorige drie maande voortduur tot en met Februarie.

Wat gemiddelde temperature betref, is daar van Okotober tot Desember 'n verhoogde moontlikheid (45 %) vir bo-normale gemiddelde temperature oor die hele voorspellingsgebied.

In die Wes-Kaap en die suidelike deel van die Oos-Kaap word naby-normale gemiddelde temperature voorspel.