Graan SA-skatting vir produksie

Koringboere behoort in die komende produksieseisoen nie meer as 1,2 miljoen ha koring te plant nie. Dit beteken dat produksie met sowat 400 000 ha (sowat die helfte meer as verlede jaar se 800 500 ha) kan uitbrei.

Dít is die raad van Graan SA wat vanjaar vroeër as gewoonlik ook inligting vir die somerseisoen bekend gemaak het. Dr. John Purchase, hoofbestuurder, sê sy organisasie het besluit om boere vroegtydig van inligting oor die produksieruimtes vir die komende produksieseisoene te voorsien. "Die sukses van die pas afgelope veldtog om produsente te oorreed om die aanbod van somergraan en oliesade by die binnelandse behoefte aan te pas en wat die pryse in die algemeen tot hoër vlakke opgedruk het, dui daarop dat boere erns het met die saak."

Purchase sê die binnelandse behoefte van koring, tesame met die uitvoer, kan sowat 2,78 miljoen ton beloop. "Dit is boonop die maksimum wat geproduseer behoort te word. Teen 'n gemiddelde opbrengs van 2,3 ton/ha behoort daar dus nie meer as 1,2 miljoen ha geplant te word nie."

Ten opsigte van somergraan en oliesade bly Graan SA se hoofbestuur by sy standpunt dat boere nie winsgewend vir die uitvoermark kan produseer nie. Die voorlopige produksieruimte is gegrond op vooruitskattings van moontlik oordragvoorrade teen die einde van die bemarkingseisoen.

Purchase sê tans dui die vooruitsigte dat die oppervlakte onder wit mielies met sowat 37 % tot 1,33 miljoen ha en dié onder geel mielies met sowat 60 % tot 920 000 ha uitgebrei kan word. Die totale oppervlakte vir mielies moet dus verkieslik nie 2,25 miljoen ha oorskry nie.

Mnr. Nico Hawkins, senior ekonoom van marknavorsing by Graan SA, sê in die skatting word net voorsiening gemaak vir uitvoer na Botswana, Lesotho, Namibië en Swaziland en dit is nog te gou om vir die produksie van bio-etanol voorsiening te maak.

Die produksieruimte vir sorghum word op 87 000 ha geraam — 'n uitbreiding van sowat 160 % op die huidige oppervlakte. Die ruimte vir sonneblomsaad is 605 000 ha (30 % hoër) en vir grondbone 66 000 ha ('n uitbreiding van sowat 33 %).

In die lig van die moontlike vervaardiging van bio-diesel uit sojabone, kan die hoofbestuur nie nou 'n aanbeveling daaroor maak nie.

Purchase sê lede moet besef dit is moeilik om nou al werklike bepalings oor oordragvoorrade te doen. "Graan SA sal boere deurlopend op hoogte hou en produksieruimtes sal na gelang van omstandighede aangepas word."

10 Maart 2006