Graanmanne wil spoorlyn toe

Die graanbedryf wil 80% van alle graan teen 2010 per spoor vervoer. Daar is egter weinig - indien enige - tekens van 'n terugskuif na spoorvervoer te sien.

Suid-Afrika het in die 1980's sowat 85% van alle graan per spoor vervoer. Tans word slegs sowat 50% graan per trein vervoer. Die res is op padvervoer aangewese, sê mnr. Boikanyo Mokgatle, die netwerkprotokolbestuurder van die Meulenaarskamer.

Gesprekke tussen die Meulenaarskamer en topbestuurslede van Transnet en die Departement van Vervoer het gelei tot die samestelling van 'n taakspan wat spesifiek op graanvervoer fokus.

Die mikpunt om 80% van graan teen 2010 per spoor te vervoer, is die dryfkrag agter die span wat bestaan uit verteenwoordigers van die Presidensie, die Departement van Landbou, die Departement van Vervoer, Transnet Spoorvrag, voedselverwerkers,
die veevoerbedryf, graanhandelaars en die Graansilo-industrie.

Op hul eerste vergadering is 'n verwysingsraamwerk gevestig en op die tweede is probleme bespreek. Hierdie gesprekke is nog nie heeltemal afgehandel nie.

Landbouweekblad, 18 Julie 2008