Grensbeheer skep bek-en-klou-gevaar

Riviere wat by die Limpopo op die grens met Zimbabwe aansluit, word as smokkelroetes gebruik en skep 'n ernstige gevaar van bek-en-klou-seer, waarsku mnr. Joe Hanekom, uitvoerende bestuurder van Agri Inspec.

Agri Inspec het die grensheining saam met die SA Polisiediens besoek. Volgens Hanekom is die heining tot sowat 10 km aan weerskante van die Beitbrug-grenspos in 'n goeie toestand, maar verder weg kan mense "oor en weer stap".

"Waar die Sandrivier in die Limpopo inloop, is nie eens 'n draad nie. Daar is ook tekens van voertuie wat die grens oorsteek en Zimbabwiese beeste wei vrylik in die spergebied. Daar is geen twyfel nie dat met vleis en velle gesmokkel word."

Hanekom sê die Departement van Landbou het geen inligtingsnetwerk om voorkomend op te tree om te keer dat siektes oor die grens versprei nie.

"Die hele bek-en-klou-seer fiasko in Limpopo wat die belastingbetaler sedert die uitbreking verlede jaar meer as R80 miljoen gekos het, kon moontlik gekeer gewees het as die Departement van Landbou ag geslaan het op vroeë waarskuwings.

"Agri Inspec het die departement 17 maande voor die uitbreek van die siekte daaroor gewaarsku nadat inligting oor 'n voorval van bek-en-klou-seer in kommunale gebied bekom is.

"Dit is geïgnoreer. Die departement het ook nie enige terugvoer gegee oor Agri Inspec se aanbod om 'n inligtingsnetwerk vir die departement in die gebied te skep nie."

22 Julie 2005