Groen lig vir leeujag bly ligrooi

Die mense wat die wette maak dink nie. Dít was die reaksie van die land se grootste leeuboer op die toegewing van die Regering dat leeus wat in aanhouding geteel is, onder streng regulasies gejag kan word.

Mnr. Ben Duminy van Lichtenburg sê om leeus ses maande te laat loop voor hulle gejag word, is totaal onprakties vir hom. Van sy jagters wil mannetjies en ander wyfies skiet.

"As hy hulle saam ses maande laat loop, gaan hulle veg, mekaar doodbyt en teen die tyd wat die jagter opdaag, gaan daardie leeuwyfie met 'n paar welpies lê. Verwag hulle 'n mens moet haar dan skiet? Dit gaan mos baie slegter publisiteit lok as enigiets tot nou toe.

"Om 'n plaas in twee te deel met elektriese heinings is ook heeltemal onekonomies," het hy gesê. Die toegewing help hom niks en hy kan eintlik sy onderneming se hekke toemaak en hulle kan die leeus kom vat, meen hy.

Die toegewing van die Minister van Omgewingsake en Toerisme bepaal onder meer dat die boer sal moet bewys dat die leeu wat gejag word, ses maande lank in 'n "betreklik groot" gebied kon oorleef, sy onderneming moet geregistreer wees en die minister kan by tye die jag van die diere verbied.

Mnr. Carel van Heerden, voorsitter van die SA Roofdier-telersvereniging, sê sy vereniging is verlig dat die minister die jag van dié leeus nie totaal verbied het nie.

Vir hom is die wagtyd van ses maande egter onverstaanbaar. "Wat is die verskil om 'n leeu wat kan oorleef te skiet of een wat net vyf of tien dae geloop het en ook prooi gevang het? Wat van die leeus wat dalk nie gaan oorleef nie? Is dit eties dat hulle van die honger moet vrek?"

Dit is 'n omvangryke bedryf en net agt leeuboere in Noordwes het meer as R85 miljoen in hul ondernemings belê en verskaf werk aan 240 mense. Die bedryfskoste van die ondernemings wat in die ekonomie teruggeploeg word, beloop meer as R12,5 miljoen per jaar.

Daar is geen duidelikheid oor wanneer die maatreël in werking tree nie en leeuboere sit met derduisende rande se deposito's van jagters wat besprekings gemaak het om leeus te kom jag. Wat moet dié boere doen?

Landbouweekblad, 5 Januarie 2007