Grondtaks: Raak betrokke, maan Agri SA

Alles is nie net "doom" en "gloom" wat eiendomsbelasting vir die landbou betref nie. As dit reg toegepas word — en daar is nog tyd tot 2 Julie om daaroor te onderhandel — hoef dit die landbou nie noodwendig te benadeel nie, sê mnr. Johan Pienaar, ekonomiese direkteur van Agri SA.

Hy het op 'n inligtingsdag in die Paarl gewaarsku daar sal egter nie weggekom kan word van die werklikheid van eiendomsbelasting op plase nie.

In 'n spesiale bedeling in die Wet op Eiendomsbelasting word daar voorsiening vir die landbou gemaak. In die volgende paar jaar is dit belangrik dat boere hulle vergewis van dienste wat aan hulle gelewer moet word ingevolge die wet, asook wat daarvan uitgesluit word en waarvoor hulle self verantwoordelik is.

"Dienste wat gelewer word, sal 'n regstreekse invloed op die belastingkoers hê," het hy gesê. "Daarom is dit nou belangrik dat boere met hul munisipaliteite daaroor onderhandel en kennis neem van dienste wat gelewer moet word, asook wat die posisie van plaaswerkers sal wees."

Agri SA het 'n handleiding daaroor beskikbaar waarin alle aspekte vervat is om 'n ligter belastingaanslag te bewerkstellig. Markwaardes, waardasies, staande oeste, huise en geboue word ook daarin bespreek.

Wat ramphulp betref, het Pienaar gesê daar is beslis 'n ommeswaai van die vorige Minister van Landbou se siening van geen hulp aan die kommersiële landbou nie. 'n Rampstrategie word nou deur die Departement van Landbou geformuleer en me. Thoko Didiza, Minister van Landbou, het reeds gesê dit is tyd dat die saak van die grond af moet kom.

Pienaar waarsku boere teen onbetroubare mense wat opleiding oor die nuwe Vuurwapenwet wil gee. "Agri SA het reeds 'n stelsel vir sulke opleiding beding en boere moet hulle daarvan vergewis."

Ander aspekte waarmee Agri SA handel, is die wetgewing oor watersake, landelike beveiliging en mineraalregte.

13 Mei 2005