Groter stuk van vleispastei vir swart boere

Die indruk dat beeskarkasse wat swart boere produseer swakker is, is besig om die nek omgedraai te word.

Dr. Nthoana Tau-Mzamane, uitvoerende hoof van die Landbounavorsingsraad (LNR), het verlede week op die bekendstelling van resultate van 'n bemagtigingsprojek om swart boere se winsgewendheid te verhoog, gesê opkomende boere lewer slegs sowat 5 % van die uitset van alle kommersiële karkasse. Dít terwyl 'n geraamde 40 % van die nasionale beeskudde in swart besit is.
Tau-Mzamane het op die LNR se Irene-kampus in Centurion gesê opkomende boere se gebrek aan die sukses wat kommersiële boere bereik, is eerder toe te skryf aan 'n gebrek aan markinligting, tegniese advies, insette en finansiering. "Van groot belang is die lae toegang en deelname in groot dele van die waardeketting, soos markte vir voerkrale," het sy gesê.

Die projek is in Julie 2001 begin met die uitsluitlike doel om opkomende swart boere se winsgewendheid te verhoog deur meer markklaar karkasse te lewer. Maar dit kon slegs bereik word as hulle op 'n volhoubare basis gerugsteun word. Altesame 400 boere uit Noordwes en Limpopo het by die projek ingeskakel.

Die Australiese hoë kommissie in Suid-Afrika was van groot hulp omdat navorsing tussen Suid-Afrika en Australië uitgeruil is. Mnr. Philip Green, hoë kommissaris in Suid-Afrika, sê afgesien daarvan dat sy land 'n ontwikkelde land is, steun Australië ekonomies swaar op sy primêre sektor, naamlik die landbou en mynbou. Hy sê in "die moderne wêreld" word dit moeiliker om suksesvol in die landbou te wees, maar dat goeie vennootskappe sukses bring.

26 Mei 2006