Hallo nylon, totsiens poli

Dit is 'n groot 'ja' vir nylonsakke om wol in te verpak. Vanaf die wolseisoen 2007/08 sal wol nie meer in poliëtileensakke verpak mag word nie. Dié besluit is verlede week op die kongres van die NWKV in die Baai geneem.

BKB sê in 'n verklaring dat hy die voorstel steun en alles in sy vermoë gaan doen om die oorskakeling na nylonsakke so glad moontlik te laat verloop. Die voorstel is ook deur die Wolforum goedgekeur.

Volgens BKB het van die wêreld se voorste wolverwerkers aangedui dat hulle nie meer wol in Suid-Afrika gaan koop wat nie in dié sakke verpak is nie. BKB beveel aan dat sy klante reeds van die komende seisoen sal probeer om alle vagwol in nylonsakke te verpak.

Dit geld ook onderlyne van 20 mikron en fyner. Wolboere moet die bestaande voorraad poliëtileensakke tot die minimum beperk aangesien dit in die toekoms heeltemal in onbruik gaan verval, sê BKB. Volgens dié maatskappy gaan dié sakke tot bykomende bemarkingskoste lei as wol wel daarin versend word.

Die jongste prys van 'n nylonsak by BKB se handelstak in Port Elizabeth is R90,97, terwyl 'n poliëtileensak R64,59 kos. Die pryse sluit BTW in.

16 Junie 2006