Handleiding oor boere se regte

Agri SA het met geldelike hulp van die Agri Securitas Trustfonds 'n handleiding saamgestel om boere bewus te maak van hul regte en riglyne te verskaf oor hoe om op te tree as hulle in hegtenis geneem sou word.

Dit volg ná talle gevalle in die verlede waar boere by gebrek aan goeie ondersoekwerk, of weens vals verklarings deur 'n klaer, wederregtelik in hegtenis geneem is. Mnr. Kobus Visser, direkteur van owerheidsdienste by Agri SA, sê dit is belangrik dat lede hulle sal vergewis van hul regte tydens 'n arrestasie, met 'n lasbrief óf sonder een. Hulle moet ook weet watter middels tot hul beskikking is as hulle onwettig in hegtenis geneem is.

Visser sê die handleiding sal eersdaags aan lede gepos word. Die inligting sal ook op Agri SA se webwerf geplaas word.