Hulp vir Wes-Kaapse boere

"Boere wat nog nie om droogtehulp aansoek gedoen het nie, moet dit so gou moontlik doen," het mnr. Cobus Dowry, provinsiale minister van landbou in die Wes-Kaap, gesê. Hierdie boodskap is aan boere gestuur nadat me. Thoko Didiza, Minister van Landbou, die verlening van droogtehulp in hierdie provinsie goedgekeur het.

Mnr. Chris Venter, programbestuurder vir volhoubare hulpbronbestuur by die Wes-Kaapse departement van landbou, sê 490 boere in die geïdentifiseerde gebiede kan vir droogtehulp in aanmerking kom. "Dit is egter 'n deurlopende proses," sê hy. Hierdie naamlys kan verander namate daar miskien reën val asook weens besluite van die ministeriële komitee, wie se taak dit is om droogtegebiede te identifiseer.

Boere wat in aanmerking kom, kan dus ingevolge die droogtehulpskema voer by hul koöperasies gaan haal.

Dowry het 'n beroep gedoen op opkomende boere wat onder die droogte in die gebied gebuk gaan, om vir droogtehulp te registreer. In Desember verlede jaar is R9 miljoen se droogtehulp aan boere in die Wes-Kaap belowe, waarvan R1 miljoen vir die sink van boorgate bestem is.

Die proklamasie vir die toepassing van droogtehulp in die Wes-Kaap is blykbaar nog nie in die Staatskoerant gepubliseer nie. Die nasionale Departement van Landbou is gevra om 'n brief te gee om hulpverlening te magtig en die proses te bespoedig.

Daar is nie duidelikheid oor hoe die hulpskema uitgebrei kan word om bystand aan graanboere te verleen nie.

14 Januarie 2005