Interessante wyn-jaar l

Met haas elke denkbare klimaatstoestand wat die afgelope wyndruiwe-seisoen geheers het, beloof vanjaar se oes om 'n groot uitdaging vir wynboere te wees, sê me. Nicolette de Kock, uitvoerende hoof van die Stellenbosch American Express Wynroetes.

"Oor die droogte en hitte hoef ons streek se wynboere niemand in die landbou te vertel nie, maar gelukkig is wingerd taai en kan dit sulke toestande trotseer, waar ander gewasse vrek. Danksy laat reën op nét die regte tye is Stellenbosse wynboere se besproeiingsdamme voor die kritieke stadium van blom en set gevul."

Hoewel wingerde in die meeste streke swaar getrek het weens die droogte en vanjaar se kleiner oes daaraan toegeskryf kan word, is daar vanjaar ook besonder goeie wingerdboupraktyke, soos lowerbestuur en oesbeheer en waterbestuur toegepas, sê mnre. Willem Botha, konsultant van VinPro, en Stefan Joubert, wingerdboukundige van Perdeberg Kelder.

Hulle het op 'n onlangse voorparsseminaar op Elsenburg gepraat.

In die Oranjeriviergebied verwag hulle dat die oes tot 20 % laer as verlede jaar sal wees, maar dit is hoofsaaklik omdat die sultanas swak uitgebot het. Ander kultivars het goed gebot en is gesond vanweë die droë weer. Die druiwe raak redelik egalig ryp en die oes is mooi en in balans met die lower.

In alle wingerdgebiede word daar verwag dat parstyd vanjaar 'n week tot 14 dae vroeër as gewoonlik begin en almal is dit eens dat klimaat tot parstyd kritiek gaan wees.

Mnr. P.G. Slabbert, wynmaker en bestuurder van Stellenbosch Hills, 'n kelder wat druiwe van wingerde oor 'n groot deel van die Stellenbosse wynstreek ontvang, sê vanjaar se oes gaan behoorlik die vernuf van die wingerdboukundiges en wynmakers toets. "Ons het donderstorms, droogte, hitte én koue gehad. Gevolglik het die wingerde bietjie van 'n identiteitskrisis ondergaan. Eers was daar stres weens die droogte, toe kom daar die fel donderstorms wat reën belaai met stikstof op die wingerde laat val het. Hierdie reën het ongeveer 75 kg stikstof per hektaar op die wingerd neergestort. Dit was wonderlik aangesien stikstof die grond voed en veral nodig is om die wingerd deur die groeityd te help."

Dit was 'n goeie meevaller wat die wingerde geil laat groei en wingerdboere genoop het om goeie lowerbestuur toe te pas om te verseker dat slegs goeie druiwe ontwikkel.

Slabbert sê oesjare soos vanjaar kan 'n goeie idee gee van die impak van klimaat op die eienskappe van 'n spesifieke jaar se wyn. "Mense sal heelwat ander eienskappe in vanjaar se wyne kan proe, wat bewys dat wyn 'n produk is wat aan die wingerd en die natuur oorgelaat word."

28 Januarie 2005