Invoer van melkpoeier bekyk

Verteenwoordigers van die Melkprodusente-organisasie (MPO) het verlede week met die Kommissie vir Internasionale Handelsadministrasie (Itac) vergader om die invoer van melkpoeier teen buitengewoon lae tariewe te bespreek.

Die MPO is bekommerd daaroor dat die vry-aan-boord-prys van sekere ingevoerde melkpoeier gemiddeld $1 300 (R9 480) per ton laer is as die aanvaarde wêreldprys. Die produkte kom hoofsaaklik uit Uruguay, Nieu-Seeland en in 'n mindere mate Argentinië. Die rede vir die lae invoerpryse is nog nie duidelik nie, maar die MPO ondersoek die saak.

Die MPO sê dit wil lyk asof die onderverklaring van goedere waarskynlik nie 'n rede vir die goedkoop invoer is nie. Daarom word ander vorme van prysmanipulasie tans ondersoek. "Sou die ondersoek toon dat storting en subsidiëring die oorsaak van die goedkoop invoer is, het Itac aangebied om handelsremedieë in te stel aangesien hy teen enige onbillike prysmanipulasie gekant is."

Itac se kernbedrywigheid is om deur tariefondersoeke, handelsremedieë en invoer- en uitvoerbeheer 'n omgewing te skep waarbinne billike handel kan plaasvind.

Landbouweekblad, 7 September 2007