Jhb-markstelsel stort in duie

Tegnici het deurnag gewerk om die rekenaarstelsel van die Johannesburgse Varsproduktemark te herstel nadat dit op 31 Maart in duie gestort het. Boere kon sedertdien nie vir hul produkte betaal word nie.

Teen gister (Donderdag) was die stelsel nog nie herstel nie, maar is die hoop uitgespreek dat boere teen die naweek betaal kon word.

Die probleem is vererger deurdat data stukkie vir stukkie uit die stelsel onttrek moes word om betalings te magtig, terwyl handel steeds voortgeduur het.

Noodvergaderings is deur die loop van die week gehou om die situasie te bespreek en planne te beraam om te keer dat dit weer gebeur.

Belanghebbendes het dit as 'n "multi-probleem" bestempel waaruit lesse geleer moet word eerder as dat beskuldigings rondgeslinger word. "Een daarvan is dat kommunikasie op grondvloervlak moet verbeter," het 'n belanghebbende gesê.

Volgens agente was daar geen daadwerklike pogings van die mark se kant om hulle óf produsente oor die probleem in te lig nie. Dit het groot verwarring veroorsaak.

"Daar is ook te min mense om die werk te doen — die hoeveelheid transaksies het stres op die stelsel en die mense geplaas."

Die mark hanteer tot 18 000 transaksies per dag.

Landbouweekblad, 20 April 2007