Jongboer-finaliste aangewys

Die provinsiale streekwenners van die Toyota Jongboer van die Jaar-kompetisie is aangewys.

Hierdie wenners is die finaliste in die nasionale kompetisie waarvan die wenner en die naaswenner later vanjaar bekend gemaak sal word.

Mnr. Jaap van der Westhuizen is die Vrystaatse wenner. Hy boer die afgelope agt jaar op die plaas Cairo in die distrik Heilbron. Hy is 30 jaar oud, lid van die boerevereniging Weiveld en Graan SA se sorghumwerkgroep en spog met die graad B.Sc. in grondkunde aan die Universiteit van Potchefstroom.

Noordwes se streekwenner, mnr. Casper Botha, se boerderyloopbaan het in 1991 begin ná hy die graad B.Com. in bedryfs- en bestuursrekeningkunde aan die Universiteit van Potchefstroom verwerf het. Dít is intussen opgevolg met 'n honneursgraad. Botha en sy vrou, Estelle, se besigheidsbenadering het daartoe gelei dat hulle hul huurgrond in 1993 kon koop. Hulle boer onder meer met aartappels, saadmielies en kommersiële mielies.

Mnr. Wally Pooler van Underberg is die streekwenner in KwaZulu-Natal. Ná die dood van sy pa sewe jaar gelede het hy die melkboerdery oorgeneem. Hy is voorsitter van die boerevereniging Underberg en lid van verskeie plaaslike studiegroepe. Hy is sekretaris van die plaaslike waterverbruikersvereniging.

Mnr. Jan Paul Grey is Mpumalanga se wenner. Hy het op die plaas Uitzigt groot geword en daarna 'n diploma in diereproduksie aan die Technikon Pretoria verwerf. Van 1994 is hy in beheer van die boerdery wat vee, 'n voerkraal en akkerbou (mielies, soja) asook winterweiding onder besproeiing en hooi insluit.

Mnr. Mias Nieuwoudt van die plaas Witkop in die distrik Nigel is die Gautengse wenner. Hy is sekretaris van Agri Nigel en boer saam met sy skoonpa met beeste en mielies.

Die Wes-Kaapse wenner, mnr. Pieter van Wyk, boer op die plaas Vetterivier in die distrik Riversdal met vee, wol, graan en volstruise. Hy beywer hom vir die verdere landbou-opleiding van sy plaaswerkers se kinders en saam met sy vrou handhaaf hy uitstekende menseverhoudings met sy werknemers.

Mnr. Marthinus Colesky is die wenner in die Oos-Kaap. Hy is 31 jaar oud en boer met uitvoersitrus op Skone Uitsig en Fairview, naby Hankey. Hy is betrokke by Agri Oos-Kaap en is sekretaris van die jongboervereniging.

Die streekwenner in Limpopo is mnr. Paul Roos, wat die graad B.Sc.Agric. in plantproduksie in 1992 met lof verwerf het en in 1993 begin boer het. Hy boer met steenvrugte, uitvoerpatats, saadmielies en graan onder besproeiing.

Mnr. Japie Engelbrecht, die Noord-Kaap se wenner, boer op die plaas Koopan-Suid, naby Gordonia. Sy boerderyvertakkings sluit in Dorperskape, Bonsmara's en wild. Hy beskou die opleiding van werkers van groot belang. Hy glo deur optimistiese gesindhede by werkers te kweek, word vaardighede makliker baas geraak.