Jonger boere los melkboerdery

Die suiwelbedryf verloor produsente teen 'n vinnige tempo. Dit is nie ouer mense wat die bedryf verlaat nie, maar jong boere, wat 'n groot leemte laat, het mnr. Deán Kleynhans, Wes-Kaapse voorsitter van die MPO in Somerset-Wes gesê.

Hy het tydens 'n werkswinkel om 'n suiwelstrategie vir die Wes-Kaap te ontwikkel, gesê plaaslike melkboere is in staat om genoeg melk vir die land te produseer en daardeur ook werk te skep. "Staak die invoer -hier is reeds 'n surplus," was sy pleidooi.

Opkomende suiwelboere moet gehelp word om winsgewend tot die bedryf toe te tree, maar onder huidige omstandighede is dit onmoontlik.

Kleynhans het gesê van die grootste probleme is allerlei skuiwergate, wat uitvoere en storting betref, in die bedryf wat uitgebuit word. 'n Strenger tariefstelsel en -beleid is nodig.

Dit is ook nie 'n vergesogte gedagte dat suiweluitvoer gesubsideer moet word nie. Die Wes-Kaapse regering kan help om dit reg te kry deur suiweluitvoer te subsideer en uitvoermarkte in Afrika te ontwikkel, het hy gesê.

22 Augustus 2008