Sy argumente was op vaste, bewese feite gebou en hy het dit kragtig en met groot oortuiging oorgedra. Die reaksie van Zuma, daarenteen, was emosiebelaai en populisties van aard sonder om historiese feite, soos deur Mulder uitgewys, in ag te neem.

Dit was gerig op sy ondersteunerskorps, waarvan die meelopers en ondersteuners van Malema ook waarskynlik in sy visier is.

As ’n doodgewone landbouer (voedselvoorsiener), en een van die vele klein bydraers tot die rykdom van ons land, wil ek Mulder graag hiermee bedank vir sy manmoedige, kragdadige en sterk optrede.

Hy was die stem van rede wat in die bresse getree het, nie net vir die landboubedryf in sy geheel nie, maar ook vir die voortbestaan van ons land.

Ek sê dit, want ek sien die laaste tyd in die gebeure aan die politieke front ál meer die tekens van uitsprake en opsweping wat ons land kan breek, soos wat Zimbabwe gebreek is, maar met die potensiaal om in omvang en skaal van vernietiging veel erger te wees.

Ons weet ook dat so iets almal, ook die plunderaars en vernietigers, ongelooflik arm en ellendig sal laat.
Ek wil glo dat my gevoel van waardering ook die onuitgesproke gevoel van baie boere en gewone denkende mense in ons land verteenwoordig.

Nogmaals baie dankie.