Aan die een kant word gepraat van nasiebou en hoor ’n mens daar word nog soms van ’n Reënboognasie gepraat.

Daar is nou ewe vroom bekend gemaak dat die Regering die Voortrekkermonument tot ’n Historiese Erfenisgebied gaan verklaar. Dit moes al jare terug gedoen gewees het.

Dink die ANC dit gaan die wit mense van die land paai terwyl daar openlik gesê word dat die wittes alles in die land gesteel het en geen aanspraak kan maak op enige grond nie? As die Regering nie iets drasties gaan doen om hierdie totale wanpersepsie die nek om te draai nie, gaan plaasmoorde tragiese afmetings aanneem. Skurke sal boere aanval en vermoor en dink hulle doen die land ’n guns. Hulle sal meen dat hulle ’n misdadiger doodgemaak het en eintlik iets goeds gedoen het. Waar gaan dit eindig?

As dié persepsie en die hele kwessie van reg op grond nie vinnig en omsigtig gehanteer gaan word nie, sal daar in Suid-Afrika nooit rus en vrede kom nie. Daar sal ook nie sprake wees van ’n verenigde nasie nie en die ANC sal in die proses verswelg word.

Die tyd is vinnig besig om uit te loop vir paai aan die een kant en wilde uitsprake om stemme te werf aan die ander kant. Hier kan ’n vuur ontketen word wat hierdie land in ’n tragedie kan dompel.

Die tyd om mense teen mekaar af te speel is verby.