Kaap Agri presteer

Kaap Agri se wesensverdienste het in die boekjaar tot 30 September met 23% tot R242 miljoen verbeter. "Dit was 'n gunstige boerderyjaar. Oeste was bogemiddeld en pryse was goed. Die gehalte van ons debiteureboek asook boere se betaalvermoë het baie verbeter," sê mnr. James Matthee, finansiële direkteur.

Dié landboudienstegroep beoog om oor die volgende drie jaar noemenswaardig uitbrei. Die groei in dié boekjaar word aan, onder meer, hoë inflasie vir produksiemiddele en reële groei toegeskryf. Die groep se Agrimark-winkels het die meeste tot sy wins bygedra. Dié afdeling se inkomste het met 31% tot R1,5 miljard gestyg.

Die afdelings vir saad, graanhantering en bemarking se bedryfswins het met 48% toegeneem. Die meganisasie-afdeling het verlede jaar se verlies in 'n wins verander. Kaap Agri se omset het met 37% tot R3,3 miljard verbeter. Inkomste het met 39% tot R2,3 miljard gestyg en die wesensverdienste uit bedrywighede het met 51% tot R92 miljoen toegeneem.

Bron:

Die Burger

5 Desember 2008