Kaap Agri toon omset van R1,9 miljard

Kaap Agri se totale omset volgens sy finansiële state is R1,9 miljard — feitlik dieselfde as in die vorige twaalf maande.

Mnr. George Eksteen, voorsitter van Kaap Agri, sê dit was 'n moeilike jaar vir die landbou, met die tweede agtereenvolgende droogte in die Swartland en produkpryse wat baie laag was. Feitlik alle produkte wat in Kaap Agri se gebied geproduseer word, se pryse word aan internasionale pryse gemeet. Met amper geen internasionale prysstygings nie en die sterk rand is boerdery se winsgewendheid onder druk.

Die wesensverdienste was R133,2 miljoen teenoor die vorige tydperk se R108,8 miljoen. By die wesensverdienste ingesluit is Kaap Agri se aandeel van R102,2 miljoen in die wins van Pioneer Voedsel. Die wesensverdienste verteenwoordig 66,9 sent per gekoppelde aandeel. 'n Dividend van 7,5 sent per aandeel word betaal.

Volgens mnr. Corwyn Botha, besturende direkteur, vorder die integrasie van die twee bedryfsmaatskappye WPK en Boland Agri goed.

Die maatskappy het ook onlangs aangekondig dat hy die bates en besigheid van die Namakwalandse Landboukoöperasie gaan oorneem. Dié transaksie is nog onderhewig aan goedkeuring deur die Mededingingskommissie.

Sou die oorname plaasvind, sal Kaap Agri 122 bedryfspunte hê wat 48 Agrimarkte in stede en dorpe in die Wes- en Noord-Kaap insluit met 'n omset van meer as R2 miljard.

Kaap Agri se algemene jaarvergadering word op 16 Februarie op Malmesbury gehou.

3 Februarie 2006