Kaap spog met beste biefstuk

Kaapstad het die tweede jaar agtereenvolgens weggestap met die louere as die plek waar 'n mens die beste biefstuk in Suid-Afrika kan geniet.

In 2004 is die Grill & Butcher in Bellville as die beste biefstukrestaurant in die land aangewys en verlede jaar het Belthazar, 'n restaurant in die Victoria en Alfred Waterfront, stof in die oë geskop van meer as 16 000 restaurante wat deur televisiekykers genomineer is. Kort op Belthazar se hakke was The Godfather in Centurion en Pachas in Pretoria.

Dié kompetisie is nou in sy agtste jaar en word geborg deur die Suid-Afrikaanse Voerkraalvereniging en Chateau Libertas.

Om in aanmerking te kom vir die pryse, moet die restaurante onder meer SA Grainfed Beef gebruik en Chateau Libertas op hul wynlyste aanbied. SA Grainfed Beef is die handelsmerk van die biefstukke wat deur lede van die voerkraalvereniging geproduseer word. Die vleis het 'n gewaarborgde vetinhoud van net 13 %.

In die kategorie vir gesinsrestaurante is die Dros in Waterkloof, Pretoria, as die wenner aangewys, gevolg deur die Dros in die Paarl en Falcon Falls Spur, Roodepoort.

'n Sommelier by Belthazar, mnr. Bantu Maseti, het 'n spaesiale toekenning ontvang as Bediener van die Jaar.

20 Januarie 2005