Karkas-merke gewysig

Regulasies van die Wet op Landbouprodukstandaarde is gewysig om dit makliker te maak om die geslag van 'n karkas te bepaal.

Ingevolge die wysigings moet die karkas van 'n beer en 'n burg wat tekens van laat kastrasie toon, met die stempelmerk M/D geïdentifiseer word.

Die karkas van 'n ram of 'n bul, asook van 'n hamel, kapater of 'n os wat tekens van laat kastrasie toon en wat as ouderdomsklas AB, B of C geklassifiseer is, moet ook met die stempelmerk M/D geïdentifiseer word.

Ramkarkasse moet op die agterpunt van die regter-agterskenkel met swart ink gemerk word en karkasse van bulle moet ook met swart ink op die voorpunt van die regter-voorskenkel gemerk word.
Die merke moet op dieselfde punt as die ouderdomsbepaling op die slaglyn aangebring word.

Die gewysigde regulasies is reeds vanaf 1 Oktober vanjaar van toepassing.

Landbouweekblad, 10 November 2006