Karsten en Capespan skik

Een van Suid-Afrika se grootste uitvoerders van druiwe, Capespan Grapes, en die land se grootste tafeldruifprodusent, Karsten-boerdery van Kanoneiland, het 'n skikking buite die hof bereik. Dit volg ná 'n kontraktuele geskil oor bemarkings- en handelsregte met sekere internasionale kliënte.

Geen besonderhede van die skikkingsooreenkoms sal bekend gemaak word nie.

Karsten-boerdery het vroeër aangekondig dat hy vrugte, waaronder dadels, druiwe, appels, pere en bessies, in die toekoms self gaan bemark. Gebaseer op 'n bestaande kontrak met Karsten-boerdery, het Capespan Grapes sowat twee weke gelede om 'n hofinterdik aansoek gedoen om die maatskappy daarvan te weerhou om druiwe aan kliënte te verskaf wat nou deur Capespan Grapes bedien word.

Albei partye het die skikking as 'n wen-wen oplossing beskryf omdat hulle voortaan in sekere areas nou sal saamwerk. Elke maatskappy kan ook eie inisiatief ten opsigte van ander marksegmente neem. Die partye stem saam dat hierdie 'n voordelige verhouding tot stand gebring het.

Mnr. Piet Karsten, voorsitter van Karsten-boerdery, meen die skikking sal sy organisasie in staat stel om uitvoer onder die maatskappy se nuwe bemarkingsonderneming, New Vision Fruit, te konsolideer. Hy is tevrede dat die ooreenkoms sy boerdery sal toelaat om beter beheer oor die bemarking van sy produkte uit te oefen.

Karsten-boerdery sal vanjaar meer as 2,5 miljoen kartonhouers druiwe vir uitvoer verpak. Die maatskappy se druiweplase is grotendeels in die Oranjeriviergebied geleë. Die boerdery besit 'n belang van 50 % in Keboes Fruit Farms, Suid-Afrika se grootste druiwe bemagtigingsinisiatief.

Volgens mnr. Marthinus Strauss, besturende direkteur van Capespan Grapes, was dit belangrik vir albei partye dat die ooreenkoms alle verpligtinge eerbiedig en in kliënte se behoeftes voorsien word. "Capespan Grapes is verheug dat die ooreenkoms hiervoor voorsiening maak en dat dit 'n stewige grondslag vir toekomstige besigheid skep."

Capespan Grapes word gesamentlik deur die Capespan-groep en die Cape Grape produsentetrust besit. Die trust bestaan uit sowat 80 druiweboere wat eksklusiewe bemarkingsooreenkomste op langer termyn met Capespan Grapes het. Capespan Grapes hanteer amper 30 % van alle uitvoer van Suid-Afrikaanse druiwe.

26 November 2004