Kartelle ook by mielies?

Altesame 12 meulenaars van mielies word deur die Mededingingskommissie se ondersoek na moontlike kartelvorming in die maalbedryf betrek. Tot dusver het die Mededingingskommissie herhaaldelik aan Landbouweekblad gesê dat die ondersoek spesifiek op die koringmaalbedryf fokus.

Dié meule se name is in Premier Foods se getuienis oor deelname in moontlike kartelbedrywighede aan die kommissie genoem. Premier het reeds erken dat hy sedert 1999 betrokke was by 'n meulekartel. Tiger Food Brands, Westra & Cross Agencies, Pioneer Foods, Ruto Milling, Brenner Mills, Progress Mills, Blinkwater Mills, Godrich Milling, Carolina Mills, Pride Mills en Paramount Mills is almal in Premier se getuienis genoem.

Vroeg in die kommissie se ondersoek na moontlike broodkartelvorming het Pioneer aansoek gedoen om amnestie in ruil vir inligting oor moontlike kartelbedrywighede. Hieruit het dit vir die kommissie duidelik geword dat daar ook sprake van kartelvorming in die maalbedryf is — nie net in die broodbedryf nie.

Vyf van die geïmpliseerde meule maal net mielies. By nadere ondersoek het dit aan die lig gekom dat Westra, Blinkwater, Progress, Pride en Carolina nie koring maal nie. Inteendeel, die een faktor wat ál die meulenaars in gemeen het, is mielies, nie koring nie.

Landbouweekblad, 7 Maart 2008