Katoen kry 'n terugslag

Nadat vooruitsigte vir katoen twee maande gelede die beste in 13 jaar was, het die wêreld se finansiële krisis en toenemende pessimisme oor katoenverbruik die prysverwagtinge 'n kwaai knou gegee.

Die gemiddelde Cotlook A-indeks ('n aanwyser van wêreldpryse) het in Oktober met 10 VSA sent geval en is nou 30% laer as aan die begin van Augustus en ook op die laagste vlak sedert Mei verlede jaar. Pleks van 'n styging in pryse in 2008/'09, soos vroeër verwag, voorspel die Internasionale Katoen-advieskomitee (ICAC) nou 'n gemiddelde Cotlook A-indeks vir 2008/'09 van 73 VSA c/lb - dieselfde as die gemiddeld vir 2007/'08.

Die stand van die finansiële markte en die verlangsaming in die wêreld se ekonomiese groei kan verbruik egter verder benadeel. Mnr. Hennie Bruwer, uitvoerende hoof van Katoen SA, sê hy is huiwerig om in hierdie onsekere tyd 'n mening te waag oor Suid-Afrikaanse aanplantings vir die nuwe seisoen.

"Die vraag-en-aanbod-situasie is die beste in 'n lang tyd, maar die krisis in die finansiële markte het die bedryf geknou. Almal hoop maar dat pryse teen die tweede helfte van aanstaande jaar sal verstewig."

Lees die volledige artikel in Landbouweekblad se uitgawe van 28 November 2008.

25 November 2008