'Kiesers moet self besluit'

Kiesers moet aandring op 'n verkiesingstelsel waar hulle leiers binne kiesafdelings kan verkies wat hulle verantwoordbaar kan hou. Dit sal 'n einde bring aan die leierskapstryd tussen die ANC-elite oor wie in beheer is en wie posisies kan uitdeel.

Dit was die kern van die boodskap van dr. Frederick van Zyl Slabbert, oudleier van die Opposisie in die Parlement en politieke analis, op Landbouweekblad en AMT se jaarlikse landbouvooruitskouingskonferensie in Pretoria. Hy sê die situasie in die land, ná die politieke onstuimigheid die afgelope ruk, kon baie erger gewees het as wat dit is.

In die vorige bedeling het die veiligheidsmagte vir onderdrukte stabiliteit in die land gesorg. Dit bestaan nie meer nie. Hy sê weens die politieke roeringe verdiep die gebrek aan dienslewering.

Die kiesers se ontevredenheid kom op grondvlak na vore in "aktivistiese anargie" op plaaslike vlak in woonbuurte. Dit is die gevolg van 'n verkiesingstelsel waarvolgens die leiers nie aan hulle kiesers verantwoording hoef te doen nie.

"Die huidige verkiesingstelsel plaas ongelooflike mag in die hande van die politieke leierskorps. Die kiesers kan net stem vir die party en die leiers plaas mense in posisies wat nie aan hul kiesers verantwoording hoef te doen nie."

Landbouweekblad, 10 Oktober 2008