Kikuyu vergiftig melkkoeie

'n Melkboerdery in die Oos-Kaap het 'n verlies van meer as R1,5-miljoen gely toe 175 koeie wat in volle produksie was onverwags weens kikuyu- of kikoejoevergiftiging gevrek het. Mnr. Walter Biggs, hoof uitvoerende beampte van Burlington Farming by Kookhuis, het gesê hulle tydens die Paasnaweek 20 koeie verloor en twee weke later is nog 155 op dieselfde land dood.

Volgens hom word kikuyuvergiftiging deur kommandowurms veroorsaak. "Die kikuyu skei 'n gifstof af wanneer die kommandowurms dit begin vreet en wanneer die koeie op die gras wei word hulle vergiftig." Diere wat erg aangetas is, gaan lê met hulle bene in abnormale posisies en hulle koppe op hulle flanke. Waterige rumenale vloeistof loop uit die neus en mond uit tydens vrektes. Die verloop van die siekte is gewoonlik twee tot sewe dae met meeste vrektes 28 uur na kliniese tekens aanvang geneem het. Daar kan verwag word dat tot 80% van aangetaste diere vrek.

Volgens Biggs is daar geen teenmiddel teen die kondisie nie en vrek die koeie binne ure van vergiftiging. Biggs sê die vrektes het almal net op een land, wat onder spilpuntbesproeiing is, voorgekom.

Hy sê hulle sou graag die karkasse aan die gemeenskap wou skenk, maar die dooie koeie is eerder in 'n sloot begrawe weens vrese dat die vleis nie vir menslike gebruik geskik is nie.

6 Mei 2009