Kopers skarrel oor wolprys-styging

Ofskoon daar al 'n geruime tyd lank aanduidings is dat wolpryse verbeter, het die jongste styging van 10 % met die opening van die seisoen die mark verras. Dit plaas wolkopers in 'n moeilike situasie om die volle styging onmiddellik aan hul klante oor te dra, sê mnr. Derick Pape van die Modiano-kopershuis. Modiano was verlede jaar een van die belangrikste kopers van Suid-Afrikaanse wol.

Pape het aan Landbouweekblad gesê die ergste droogte in bykans 'n eeu in Australië is die vernaamste rede vir die styging. "Daar bestaan ook vrese dat minder wol as wat aanvanklik verwag is in die tweede helfte van die seisoen aangebied gaan word. Groot bestellings is ook gedurende die Kersreses by Chinese wolverwerkers geplaas. Om hul kontrakte na te kom, was die Chinese verplig om met mening tot die mark toe te tree. Dit het die mark verder ondersteun."

Pape sê die verswakking van die rand én die Australiese geldeenheid teenoor die Amerikaanse dollar is deels verantwoordelik vir die beter pryse wat boere nou ontvang. Die feit dat die prys tans sowat 75 % hoër is as verlede jaar dié tyd, dui egter ook op 'n onderliggende goeie vraag na die vesel.

"Hoewel daar aanduidings is dat daar in die volgende twaalf maande minder wol in die wêreld beskikbaar gaan wees, bestaan daar ook vrese dat indien pryse té gou té skerp styg, dit 'n ongunstige uitwerking op die vraag mag hê. Dit kan op sy beurt 'n demper op die mark plaas. Produsente moet daarop bedag wees dat die mark homself kan regstel," het Pape gewaarsku.

Mnr. Petrus de Wet, voorsitter van die NWKV, sê daar moet in gedagte gehou word dat die styging van 'n baie lae vlak kom. "Selfs al het die mark die afgelope jaar met meer as 70 % gestyg, is die prys steeds laer vergeleke met die vorige hoogtepunt".

"Hoewel dit 'n beweging in die regte rigting is — iets waarvoor boere dankbaar is — behoort die wolprys nader aan R60/kg te wees. Dít is dubbel die prys van lamsvleis en dit is waar die wolprys hoort."

De Wet sê hoewel 'n regstelling nie uitgesluit kan word, dit nie te drasties behoort te wees nie aangesien die voorraadvlakke tans relatief laag is en dit geruime tyd nog die geval sal wees.

26 Januarie 2007