Korog dalk beste vir biobrandstof

Korog het 'n blink toekoms as grondstof in die vervaardiging van etanol, het mnr. Ad Vrolijk van die Britse saadmaatskappy, Senora Bpk., tydens die opening van die sesde internasionale korogsimposium op Stellenbosch gesê.

Die druk wat regerings van talle lande toenemend op hul plaaslike brandstofbedrywe plaas om meer biobrandstof te gebruik, speel in die hande van die vervaardigers van bio-etanol en biodiesel. Klimaatstoestande bepaal gewoonlik watter gewas as grondstof vir die vervaardiging van bio-etanol gebruik word. In Amerika is dit byvoorbeeld mielies, in Brasilië suikerriet, terwyl kanola in Australië vir die vervaardiging van biodiesel gebruik word.

Vrolijk sê hoewel korog nog in die skadu van meer algemene grane, soos koring en rog, staan, sal produksiekoste en die doeltreffendheid van die vervaardigingsproses uiteindelik die deurslag gee. Triticale het 'n hoë styselinhoud, lae proteïen-inhoud en kan in marginale toestande gekweek word. Daarbenewens is die koste om korog te produseer, laag. Dit alles dra by tot 'n vervaardigingsproses wat aansienlik doeltreffender is as dié van ander gewasse.

In Swede word reeds goeie resultate met etanol uit korog behaal.

Die gebruik van korog as grondstof in die vervaardiging van etanol sal volgens Vrolijk kwalik kos uit mense se monde neem. "Ten spyte van vele navorsers se pogings kan korog nie juis as voedsel beskou word nie en sal dit maar altyd 'n nismark teenoor koring bly."

Vrolijk sê ook al voldoen korog aan alle tegniese vereistes vir 'n voergewas, is voervervaardigers traag om dit te aanvaar. Wat dus oorbly, is om dit in etanol om te sit.

Hy het voorgestel dat 'n korog-etanol-netwerk gevorm word om toetse te ontwikkel, navorsing en oplossings en geskikte plantmateriaal uit te ruil.

Die vierjaarlikse simposium van die internasionale korogvereniging (ITA) is vanjaar vir die eerste keer in Afrika gehou. Mnr. Herman Roux, prof. R. de V. Pienaar, die tegnikus en genetikus wat baanbrekerswerk op korogteling in Suid-Afrika gedoen het, dr. Anna Strzembicka van die Poolse instituut vir planteteelt en akklimatisasie in Krakou wat die Tadeusz Wolski-toekenning namens dr. Adam Lukaszewski van die Universiteit van Kalifornië ontvang het, drr. Henry Darvey, sekretaris van ITA en dr. Francois Marais van die Universiteit van Stellenbosch het die opening bygewoon.

15 September 2006