Melksisteme: Volvoer of Weiding

Hieronder is Gerdie Landman van die Mooimelk Koeihotel van Cookhouse se mening. 

• Melkproduksie van weidings af gaan altyd gepaard met fokus op produksie, sonder om noodwendig die verbruikspatroon van melk in ag te neem... en dit beteken seisoenale melkprodusie saam met die gunstige groei van gras in die lente en die somer...
• Direkte melkproduksiekoste van weidings is beslis goedkoper as volvoerstelsels waar daar beduidende meganisasie ter sprake is... maar, dis gegrond op die aanname dat die grond en besproeiingstelsels reeds in plek is... en dis natuurlik nie 'n billike vergelyking nie.
• Om genoeg besproeiingsgrond te besit, waar voer vir die melkkudde geproduseer kan word, kan 'n aardige kapitale uitleg behels... In die Tsitsikamma kos 'n melkplaas met besproeiing nou sowat R100 000 per Ha.  Die drakrag is sowat 3 melkkoeie per Ha (Onthou daar moet kos vir die ander 50% onproduktiewe diere in die kudde ook wees) Om dus 200 Ha te koop kos R20 miljoen - sonder die 600 koeie met hul nageslag...
• Dis die groot voordeel van volvoerstelsels... jy kan met 'n melkstal en mark vir konstante produksie deur die jaar, danksy die opberging van kuilvoer, met 'n veel kleiner kapitale uitleg wegspring - omdat jy voer van die 2de buurman van jou af en selfs sover as wat 'n trekker met sleepwa kan ry, kan aanry.   Ons ry kuilvoer 30 Km aan met ons eie trok, en dit het groot voordele omdat ons nie al daardie grond hoef te besit nie...
• Die weidingstelsel se nadeel is dat jy koeie hoogstens 3km in een rigting kan laat stap om te gaan wei... dus het jy 'n perk op getalle en melkvolume uit een melkstal. 
• Die ander groot voordeel van die volvoerstelsels is dat jy beslis meer markgerig kan produseer, en dus 'n beter jaarprys vir jou melk kan beding... teen laer risiko soos Hanskalf dit self ook stel...!
• Die nagmerrie vir 'n besproeiingsmelkboer as sy water opraak, is dat hy nie gerat is om baie diere te voer nie...!
• Beplan om eers genoeg kuilvoer vir 'n hele goeiseisoen te maak voordat jy begin melk, sodat daar altyd 6 maande se voorraad voer op hande is... en begroot maar daarvoor, dit kan baie geld vasmaak...