Eksekuteurskoste in boedel met een huis
Vraag:
My oupa is dood, hy het geen geld of ander besittings nagelaat behalwe 'n 5-vertrek huis met 'n agterkamer. My oupa het die boedel bemaak aan my pa (op swart en wit). Ek wil net weet, moet dit dan deur 'n hele proses gaan voor my pa die die huis op sy naam kan kry, want in die boedel is daar ook 'n eksekuteur, en hoeveel sal die koste min of meer wees?
Antwoord:
Indien die huis die enigste bate in die boedel van u oorlede oupa was, sal die huidige markwaarde van die eiendom bepaal of die boedel beredder moet word ingevolge die normale prosedure neergelê in die Boedelwet, of andersins sal bepaal kan word of dit beredder sal word in terme van Art 18(3) van dieselfde wet.
Indien die waarde van die eiendom meer as R125 000 beloop, is die normale boedelberedderingsproses van toepassing. Dit behels die nodige kennisgewings aan skuldeisers en advertensies daarvan, asook die boedelrekening, en uiteindelike oordrag van die eiendom op die naam van die erfgenaam. Die hele proses word behartig deur die eksekuteur in die testament aangestel, en sy eksekuteurskommissie bedra 3,5% van die totale waarde van die bates in die boedel. (In hierdie geval die waarde van die huis).
Indien die waarde van die bates in die boedel, naamlik die woonhuis, minder as R125 000 bedra, word die boedel beredder ingevolge die vereenvoudigde en veel spoediger proses in terme van Art 18 (3) van die Wet. Die eksekuteurskommissie bly egter dieselfde.
Jou vader sal egter moet wag vir die hele proses om voltooi te word alvorens hy die huis op sy naam sal kan transporteer.
* Geskryf deur Butch van Blerk, direkteur, Bill Tolken Hendrikse Ingelyf, van Bellville, Kaapstad. butch@billtolken.co.za
31 Julie 2012
1295 keer
gelees |
11 kommentaar
