Mynregte en waterlisensie
Vraag:
Goeie more,
Daar word tans op n gedeelte van my grond gemyn. Daar is jare terug (1950 - laat 1980's) daar gemyn, toe opgehou en toe weer so 5 jaar terug begin. Ek was baie nou betrokke met onderhandelings aangaande die "weer begin" van die myn en het aangedring op beter kompensasie (nog steeds baie sleg, maar beter as in die verlede) en hoe gerehabiliteer gaan word ens. My doel was NOOIT om die myn te stop of selfs te vertraag nie, maar ek wou seker maak van ordentlike rehabilitasie.
Die watergebruik pla my egter op die oomblik. Daar is nie baie water in die omgewing en ek wil nie he hul moet dit mors of besoedel nie. Ek het hul vandag gevra waarvoor hul n spesifieke boorgat gebruik en of hul die nodige water "lisensies" het. Die antwoord was as volg:
"We have submitted the water use license some time ago but the mechanics of the water affairs department are quite slow. From experience we shouldn't expect any reply for at least 12 to 18 months."
Dit pla my want hul myn en gebruik die water alreeds vir seker 2 jaar al. Ek het aan hulle die voorbeeld gegee dat dit is soos om n wapen te koop en te gebruik, alvorens jy n lisensie het.
Wat is u mening hieroor asb.
Groete,
Andre.
Antwoord:
Die Nasionale Waterwet 36 van 1998 verleen aan die Departement Waterwese die reg om inligting in te win wat benodig word ten einde die optimal gebruik van waterbronne te verseker. Die registrasie van waterverbruik is een van hierdie meganismes.
Alle waterverbruikers wat deur die wet voorgeskryf word, het ‘n verpligting ingevolge die wet hul waterverbruik te registreer by die Departement van Waterwese.
Die volgende gebruikers, wat nie hul hul water vanaf ‘n diensverskaffer soos plaaslike owerheid, besproeiingsraad, staatswaterskema en waterraad ontvang nie en ander grootmaatverskaffer ontvang nie, moet registreer:
Besproeiing
Myndoeleindes
Voerkrale
Afleivore uit riviere en strome
Opgaar van water – damme, ensovoorts.
Registrasie het betrekking op alle bestaande gebruik ingevolge bogenoemde.
Versuim om aldus te registreer, stel die gebruiker bloot aan strafregtelike vervolging. Die onwettige gebruik ooreenkomstig bogenoemde, kan lei daartoe dat die gebruiker sy reg tot die gebruik van die water verloor.
Tensy die die mynmaatskappy dus aan u kan toon dat hulle aansoek gedoen het vor registrasie, mag hulle nie die water gebruik nie en kan u dit met die Departement van Waterwese in u area opneem.
* Geskryf deur Butch van Blerk, direkteur, Bill Tolken Hendrikse Ingelyf, van Bellville, Kaapstad. butch@billtolken.co.za
4 Julie 2012
718 keer
gelees |
2 kommentaar
