Probleme met tranportaktes
Vraag:
Ek het ‘n stukkie grond gekoop met twee transportaktes, in die middel van my grond is nog ’n stuk wat aan iemand anders behoort, m.a.w. dit verdeel myne in twee. Ek het die eienaars in die hande gekry en ons het ooreen gekom op ’n prys. Die problem is nou dat die grond op die persoon se ma se naam is en sy is oorlede, die grond was nooit in die boedel gewees nie en die boedel is afgehandel. Ek het met ’n prokureur gepraat op die dorp en hy het my verduidelik dat dit baie moeilik gaan wees om die grond te koop. Ek het ’n “gentleman’s agreement” met die “eienaars” om die grond te gebruik maar ek wil dit graag koop. Ek werk in Angola en dit is moeilik vir my om iemand te kry om dit uit te sorteer alhoewel dit my pas om die grond sonder koste te gebruik, moet ek dit op my naam kry aangesien ek al ’n paar rand spandeer het aan heinings en water. Ek vertrou egter die familie (“eienaars”) maar hulle weet ook nie hoe om die problem op te los nie. My vraag is:
1. Kan jy help met so iets?
2. Indien so, wat het jy van ons kant af nodig?
3. Hoe lank vat so iets?
4. Wat sal die koste wees?
Ek is in die proses om die mense solank “huur” te betaal in die tussen tyd omdat die seun van die oorledene (wetige eienaar) ’n pensionaris is.
Antwoord:
Indien die eiendom nog op die oorlede moeder se naam in die Aktekantoor geregistreer is, behoort dit as ’n bate in haar boedel gehanteer gewees het. Indien dit nie die geval was nie, sal die destydse eksekuteur daarmee ingevolge sy magte moet handel en sal die eiendom en ‘n moontlike daaropvolgende kooptransaksie met hom opgeneem moet word. Die familielede met wie jy tans kontak het, kan jou prokureur van die inligting oor die boedel/ eksekuteur voorsien ten einde onderhandelings of ‘n kooptransaksie vir jou aan die gang te kry. ‘n Prokureur wat in eiendomsreg spesialiseer, kan jou vir seker hiermee help deur slegs die kontakbesonderhede van persone met wie jy in kontak was te bekom en die nodige ondersoeke en onderhandelings daarvandaan verder te voer. So ‘n proses kan etlike maande duur, aangesien dit moontlik is dat verdere stappe eers deur die eksekuteur gevolg sal moet ingevolge die bepalings van die Boedelwet word, soos byvoorbeeld om die likwidasie en distribusierekening weer te adverteer, en daarna die moontlike oordrag van die grond. ’n Aanduiding van wat die koste sal behels, sal ‘n prokureur jou kan gee nadat hy ‘n voorlopige ondersoek gedoen het.
* Geskryf deur Butch van Blerk, direkteur, Bill Tolken Hendrikse Ingelyf, van Bellville, Kaapstad. butch@billtolken.co.za
25 Junie 2012
916 keer
gelees |
3 kommentaar
