Wil plaas in drie dele verdeel
Ingestuur deur Janbez op 21 Februarie, 2012 - 09:06
Vraag
Ek het jou antwoord oor die afsny van grond op LBW se webwerf gelees.
http://www.landbou.com/kundiges/regskenner/wil-grond-laat-afsny-wat-nou
Ons is in 'n effense ander posisie:
Ons een plaas is 492 ha en bestaan uit drie dele van onderskeidelik 7,6 ha, 285 ha en 199 ha - elkeen met sy eie lotnommer, maar saam op 1 titelakte. Hulle is m.a.w. notarieël gebind ("notorial tie"). Die grond is te koop, maar in ons area (Hluhluwe, KZN) soek almal plase van so 200 ha.
Ons het al oral raad gevra maar niemand kan vir ons sê of dit moontlik is en hoe dit gedoen kan word om hierdie stukke los te maak van mekaar nie. As ons dit kan ontkoppel en die kleintjie se grense skuif om dit dan "lewensvatbaar" te maak (miskien so 100 ha) sal ons die stukke los baie makliker en winsgewender kan verkoop.
Indien jy kan help kan ek vir jou al die nodige detail en titelakte aanstuur. Die plan is om die 3 dele te ontkoppel en dan die kleintjie (H120) se grense te skuif sodat dit miskien so 100ha is en dan die 3 apart te verkoop.
Antwoord
Deur: BUTCH VAN BLERK
Jul plaas bestaan soos jy aandui uit drie stukke grond wat almal in terme van een transportakte gehou word. Gedurende 1971 het die Minister van Landbou in terme van Wet 28 van 1966 ‘n voorwaarde oor al drie julle stukke grond opgelê, wat vereis dat nie een van die drie stukke apart van mekaar verkoop/vervreem mag word nie, behalwe met die minister se skriftelike toestemming.
Hierdie voorwaarde het dieselfde uitwerking as die verbod op die onverdeling van landbougrond sonder die minister se skriftelike toestemming en julle verkeer feitelik in dieselfde situasie in die sin dat die minister se toestemming in skrif benodig word voordat enige van die 3 gedeeltes verkoop mag word.
Dit is dus raadsaam dat julle so spoedig doenlik met die proses begin om toestemming te bekom om die eenhede afsonderlik te verkoop. Dat dit egter toegestaan sal word, is nie ‘n gegewe nie. Die Minister mag ook verdere voorwaardes oplê wat op ‘n verkoping betrekking mag hê, soos dat dit met ander landbougrond gekonsolideer moet word, of wat die geval ook al mag wees.
* Geskryf deur Butch van Blerk, direkteur van Bill Tolken Hendrikse Ingelyf van Bellville, Kaapstad. butch@billtolken.co.za
21 Februarie 2012
Addisionele dokument
- 1190 keer gelees
Geborgde skakels
Daaglikse nuusbrief
Weeklikse nuusbrief
Teken In
E-pos forum
Gewildste stories
Alle regte voorbehou. © Landbou.com 2011. In Suid-Afrika gepubliseer deur Media24
Web Development by FormFunction
Kommentaar
Sterkte my vriend hoop jy gaan suksesvol wees na n paar jaar ???
Moet nie nou al 'n landmeter by jou saak betrek nie. Hy gaan jou opmeting geld vra nog voordat iets goedgekeur is. Vra 'n beplanner om die aansoek vir jou te doen. Hy sal 'n herverdelingskaart teken en aansoek loods. Dit moet verkieslik iemand in Pretoria wees aangesien die departement daar is en dit net makliker is as jy hulle self kan gaan sien.
Laat 'n landmeter jou help met die aansoek sodat daar terselfdertyd aansoek gedoen word vir onderverdeling en konolidasie sodat die kleiner gedeelte groter gemaak word. Die hoeveelheid eiendomme bly dus dieselfde. Probeer uitvind hoekom die eiendomme oorsponklik verbind was. Dept. LAndbou se Hulpbron bewaring neem hulle besluit aan die ahnd van die lewensvatbaarheid van elke deel. (ten minste 20 Ha lande met 10 Ha waterregte of 60 GVE kan dra.)
Lewer kommentaar. (Jy hoef nie ingeteken te wees nie.)