Metodes vir kastrasie van kalwers

Vraag:
Ek wil uitvind waar ek die apparaat kan koop wat die boer gebruik om die kalwers se teelballe af te sit d.m.v. die gebruik van daardie "rekkies"? - Hennie van den Berg (hennie@maximumcover.co.za)

Antwoord:
Wat is die doel van kastrering?
 

• Die bulkalf sal nie meer kan teel of voortplant nie.
   
• Vir voerkraal-kalwers, is die afronding van gekastreerde bulkalwers vinniger as vir nie-gekastreerde bulkalwers.
   
• Gekastreerde bulle is makliker om te hanteer.

  Wanneer moet bulkalwers gekastreer word?
  So vroeg as moontlik en vóór 'n ouderdom van 2 maande.

  Metodes van kastrasie:
  1. Burdizzo
   

• Die bloedvate en die saadstringe word afgesny sonder dat die skrotum se vel gesny word.
   
• Een saadstring moet op 'n slag gesny word en dit is belangrik dat die 2 saadstringe op verskillende vlakke gesny moet word (die een op 'n hoër vlak as die ander) - indien dit nie gedoen word nie, sal die bloedtoevoer na die skrotum onvoldoende wees en kan gangreen intree.
   
• Dit is 'n bloedlose metode en dit lei selde tot infeksie.
   
• Die uretra of urienbuis kan wel beskadig of afgesny word indien die metode inkorrek is - die volgende kliniese tekens dui op 'n beskadigde uretra:
  - Bloed in die urine.
  - Swelsel onder die maag rondom die peester.
  - Buik swel op.
  - Kalf kan nie urineer nie.
  - Erge pyn.

  2. Elastrator
   

• Die rubber-ringetjies word d.m.v. 'n elastrator aangewend tussen geboorte en 'n ouderdom van 10 dae.
   
• Die nadeel is dat die metode kan lei tot tetanus of klem in die kaak.
   
• Die metode is ook meer geneig om tot infeksie te lei.
   
• Die metode is meer pynlik.
   
• Dit is 'n bloedlose metode.

  3. Oop kastrasie
   

• 'n Skerp mes of 'n skalpel word gebruik om die die skrotum mee oop te sny en die teelballe word dan met 'n kastreertang afgeknip wat die bloedvate ook toe knip - dit is beter om 'n kastreertang as 'n mes te gebruik.
   
• Dit is 'n pynlike metode en is geneig om te lei tot infeksie.

  4. Kort skrotum-metode
   

• Rubber-rekkies word gebruik om die teelballe in die buikholte te hou en te verhoed dat hulle afsak in die skrotum in.
   
• Dit lei tot onvoldoende temperatuurregulasie in die teelballe.
   
• Dié metode word glad nie aanbeveel nie, aangesien dit die risiko inhou dat die teelballe kankeragtig kan raak en nie 'n metode is wat 'n onvermoë om te kan teel of voortplant waarborg nie.

  Onvoldoende kastrasie kan veroorsaak word indien enige van die bogenoemde metodes nie effektief toegepas word nie.

  Nasorg:
  - Hou die diere dop vir ongeveer 10 dae ná kastrasie vir enige tekens van erge swelling, pyn, verlies van aptyt, infeksie en koors.
  - Vliegbeheer is uiters belangrik.

  Besoek u naaste koöperasie of skakel u veearts wat u sal kan inlig waar om die nodige instrumente te bekom.

  Bron: Nasionale Departement van Landbou

   

• Geskryf deur: Dr. Sunelle Strydom, Intervet

  5 Februarie 2007