Spons-, milt- en lamsiekte

Vraag:
Ek moet my diere binnekort teen sponssiekte, miltsiekte en lamsiekte inent. Watter voorsorgmaatreëls moet ek tref?

Antwoord:
Onthou dat met alle dooie (geïnaktiveerde) entstowwe, waar diere vir die eerste keer ingeënt word, moet 'n tweede skraagdosis, 4 tot 6 weke na die eerste enting gegee word om goeie vlakke van immuniteit te bewerkstellig. Entstowwe moet altyd koel gehou word, verkieslik met yssakkies, tussen 2 °C en 8 °C, maar moet nooit toelaat dat hierdie entstowwe vries nie.

Die gebruik van antibiotika (2 weke voor en ná enting), direkte sonlig en hitte, asook die gelyktydige gebruik van ontsmettingsmiddels, kan die lewendige fraksies van entstowwe vernietig.

Verskillende entstowwe moet nie in dieselfde spuit gemeng word nie, daar is goedgekeurde kombinasie-entstowwe in die handel beskikbaar. Steriliseer spuite en naalde deur dit vir ten minste 15 minute te kook. Waar enigsins moontlik, gebruik altyd een naald per dier.

Hou in gedagte dat selfs wanneer 'n kwaliteit entstof korrek toegedien word, daar altyd 1 % van die diere kan wees wat nogtans 'n swak immuniteit mag ontwikkel.

7 Januarie 2005