Bestry wildedadel

Vraag:
Met betrekking tot die wildedadel (Fadogia homblei- Rubiaceae) wil ek graag weet of dit moontlik is en wat die doeltreffendheid daarvan is om die plant uit te skoffel en/of uit te ploeg.

Ek het letterlik plate van die goed en dit klink vir my na 'n arbeidsintensiewe storie om elke plant met 'n botteltjie kopersulfaat uit te roei.

Weet u dalk hoe lank dit neem vir die plante wat op dié manier uitgeroei word, om te vrek? Wat betref die gifblaar en gousiekte-bossie wil dit blyk dat ek dit dalk met die grysappel verwar het. Ek hou maar my oë oop en sal kyk wat uitslaan met die eerste reëns wat ons so pas gehad het. - Nelius van Tonder (nelius.vt@iafrica.com)

Antwoord:
Soos ek in my vorige antwoord genoem het, dink ek nie dit is 'n goeie idee om die plante te probeer uitroei nie. Fadogia is giftig in November wanneer die plante uitloop.

Bewei die kampe wat skoon is van Fadogia homblei gedurende November, Desember en Januarie. Daarna is die plante volwasse, hard en baie minder giftig.

Uitskoffel gaan nie help nie, want die plante gaan volgende jaar weer uitloop. Indien die area geploeg word, sal dit die plante vir 'n hele paar jaar terugsit en selfs doodmaak. Indien jy twyfel oor die indentifikasie van die gifblaar/goorappel/grysappel/gousiekte groep plante, moet jy van die plante instuur sodat ek jou kan help met die identifikasie.

• Geskryf deur prof. Neil Fourie, Intervet

  Landbouweekblad, 09 Oktober 2007