Snoei van doringbome – verdere antwoord
Ingestuur deur Faffa op 25 Oktober, 2010 - 15:32
Vraag
Ek het u adres op internet gekry waar u 'n vorige persoon se vraag oor die snoei van doringbome beantwoord.
Ek het, reg of verkeerd, my doringbome(± 5 jr oud) se onderste takke van tyd tot tyd afgesny om onderdeur die bome, wat op 'n grasperk staan, te kan loop. Ek het ook gesien die bome het die laaste paar jaar heelwat dooie takkies en ek het hulle, waar ek kon bykom, afgesny.
Ek sal graag u kommentaar hieroor wil kry, asook oor die verskynsel dat die oudste boom vanjaar heelwat gom uitgestoot het en van sommige van die klein takkies is volgepak met 'n baie klein rooierige skubbetjie, nie op die groen uitloopsels nie, maar wel op ouer klein takkies, wat in sommige gevalle effens dood is.
Ek sal u kommentaar waardeer. Avril Malan.
Antwoord
Dit is nie ongewoon om doringbome te snoei om die groeivorm te bepaal nie.
U sê ongelukkig nie watter spesie u geplant het nie. As dit koorsbome (Acacia xanthophloea) is, kan te veel dooie takkies ‘n gevaarteken wees, wat kan dui op ‘n siekte of insekskade. Maar as dit van die ander, harder bassoorte is, is dooie takkies – binne perke – ‘n algemene verskynsel.
Die feit dat van die ouer bome gom produseer, is ‘n natuurlike verskynsel. As die boom op ‘n manier seer kry en ‘n letsel (wond) opdoen, dien die gom as beskerming teen infeksie deur siektes en plae.
Interessantheidshalwe, doringboomgom word in ‘n baie groot verskeidenheid industrieё gebruik, o.a. in die voedsel-, farmaseutiese, kosmetiese en verfindustrieё. Verder speel dit ook ‘n belangrike kulturele rol in baie lande.
U beskryf nie die klein skubbetjies waarna u verwys nie. Dit kan moontlik dopluise wees. Om by die kleurbeskrywing in te pas, het ek gedink dat dit dalk die sagte bruin dopluis kan wees. Hulle is rooibruin van kleur en die wyfies kan tot 5mm lank word. Die swart dopluis is bruin tot swart en effens kleiner. Beide hierdie spesies produseer heuningdou en omdat u dit nie spesifiek noem nie, neem ek aan dat dit nie een van die twee is nie.
Die gepanserde dopluise is oor die algemeen kleiner (2-3mm lank) en skei nie heuningdou af nie. Die algemeenste spesie in Suid Afrika is die rooidopluis en word soms die sitrusdopluis genoem. Dit is ‘n baie ernstige plaag op sitrus, maar kom ook op omtrent 200 ander plantsoorte voor. ‘n Ander moontlikheid is die ronde pers dopluis. Dit is persbruin van kleur met ‘n helder rooi kolletjie in die middel. Nie een van hierdie sal skadelik wees nie tensy die infestasie baie swaar is.
Maar soos gesê, ek raai net dat dit dopluise is, dit kan ook ‘n ander oorsaak hê.
Geskryf deur: dr. Victor Whitlock, landboukundige (whitlockv@yahoo.com).
25 Oktober 2010
Addisionele dokument
- 1309 keer gelees
Geborgde skakels
Daaglikse nuusbrief
Weeklikse nuusbrief
Teken In
E-pos forum
Gewildste stories
Alle regte voorbehou. © Landbou.com 2011. In Suid-Afrika gepubliseer deur Media24
Web Development by FormFunction
