Vogpersentasie van mielies beїnvloed prys

Die somerreënvalstreke in Suid-Afrika het relatief droë winters en dit is ook gedurende hierdie tyd wanneer mielies gestroop moet word. In Suid-Afrika word mielies geag droog te wees wanneer die voginhoud ≤ 14% is. Die massa waarop die produsent uitbetaal word, is egter gebaseer op ‘n voginhoud van 12,5%. Indien die vog onder 12,5% is, word die produsent nie daarvoor vergoed nie en verloor hy dus massa. Baie graansilo’s in die land is toegerus met graandroërs, wat die moontlikheid aan die produsent bied om sy mielies teen vogpersentasies van so hoog as 20% te kan lewer. Die produsent kan dus sy kontantvloei versnel deur die mielies natter te lewer en droogkoste te betaal. Die koste om die mielies te droog, moet egter verreken word teenoor die rente-en kapitaalverpligtinge wat die produsent moet nakom. Daar mag ook ander oorwegings wees, soos om byvoorbeeld oesreste beskikbaar te hê vir weiding, of om lande betyds gereed te kry vir ‘n volgende oes.