Perdesiekte in Marico?

Vraag:
Is daar enige gebiede in Suid Afrika waar perde nie aangehou kan word nie? Ek wil graag 'n perd of twee vir plesier aanhou op ons plaas in Marico, maar sommige plaaslike mense (wat nie perde ken nie) beweer perde kan nie daar oorleef nie. Die rede wat aangevoer word is perdesiekte en ook hartwater. Volgens wat ek egter weet en gehoor het, is perdesiekte algemeen en moet alle perde oral in SA daarvoor ingeënt word, en dat perde nie vatbaar vir hartwater is nie. Is daar dus enige ander rede hoekom perde moontlik nie daar aangehou kan word nie. Gedurende die Boereoorlog was daar baie perde. - Janeen van der Walt (janeen.vanderwalt@vodacom.co.za)

Antwoord:
Daar is geen areas in Suid-Afrika waar perde nie aangehou kan word weens perdesiekte nie.

Daar is wel sekere areas wat hoër risiko areas is vir perdesiekte, bv. Mpumulanga, dele van Natal en Gauteng. Die enigste area waar daar nie perdesiekte voorkom nie, is Kaapstad, waar die teenwoordigheid van die siekte op 'n gereelde basis gemonitor word. Daar is geen beheer op die verskuiwing van perde nie, behalwe na Kaapstad toe, waar permitte benodig word.

U kan verseker perde aanhou in Marico. Neem net die algemene voorsorgmaatreëls om perdesiekte te voorkom, soos inenting, die perde in stalle te hou ná skemer en gebruik insek-afweerders. Hierdie voorsorgmaatreëls moet geneem word in alle areas. Perde kry nie hartwater nie, maar hulle kry wel bosluiskoors wat deur bosluise (rooipoot en bontpootbosluise) oorgedra word en dus voorkom kan word deur goeie bosluisbeheer toe te pas (dipmiddels, sproeimiddels en bosluis ghries). 'n Produk, soos Quadrepel (Reg. No. G3328/Wet 36/1947), is 'n middel wat gebruik kan word om insekte af te weer en bosluise te dood.

• Geskryf deur: Dr. Carolyn Chelchinskey, Intervet

  24 Januarie 2007