Jong kêrel wil begin boer

Vraag:
Ek is nou 15 jaar oud en ek het gewonder of ek 'n klein boerdery moet begin, ek het ook 'n paar vennote wat sal belang stel, ons het gedink ons kan met hoenders of selfs tamaties, beet, uie en aartapels begin. Al probleem is dat ons moet klein begin want ons het nie baie geld om te gebruik nie, is dit dalk wys om vennote te hê? - Jaco Pretorius (elsabepretori@gmail.com)

Antwoord:
Kom ek vertel jou eers 'n storie: 'n Man kom by sy vriend en sê vir hom "Jy het die geld en ek die ondervinding. Kom ons begin saam 'n besigheid." Toe antwoord die vriend: "Nee ek dink nie so nie want ek is bang oor 'n paar jaar sit JY met die geld en EK met die ondervinding!"

Wat ek vir jou probeer sê is dat jy baie versigtig moet wees om vennote in te sluit. Gewoonlik werk dit so dat jy eers alleen begin en as jy dan op 'n stadium wil uitbrei en kapitaal of bestuurskapasiteit nodig het, dan trek jy 'n vennoot in. Ek kan jou waarborg dat jy 'n baie goeie kans het om die verkeerde vennoot in te trek. Aanvanklik is almal altyd baie opgewonde oor JOU idee, veral as daar die moontlikheid van geld ter sprake is.

Sodra mense egter agterkom dat dit met harde werk gepaard gaan, kry jy al meer "sleeping partners". Aanvanklik gaan jou besigheid nie geld maak nie maar jy gaan baie hard moet werk. As jy dan 'n vennoot ingebind het, sit jy met hom as 'n passasier. Vra my, ek praat van eerstehandse ondervinding. Jy kan dalk jou pa as vennoot nader met die "jy het die geld en ek die plan" benadering maar loop wye draaie om ander persone.

• Geskryf deur dr. Philip Theunissen, www.forensies.com

  12 Maart 2009