Keuse van ‘n hond: Cocker Spaniel of Engelse Boel

Met Engelse Boel neem ek aan jy bedoel die Engelse bullterrier (of is dit ‘n bulhond / bulldog?).  Die bullterrier is bekend vir uitstekende menseverhoudinge, maar swak sosiale vaardighede. As hulle by ander honde kom, baklei hulle graag.  Die spanjoel sal weer beter met die ander honde oor die weg kom, maar nie noodwendig met kinders nie – om een of ander rede kan hulle nogal byterig wees.   As mens die jong hondjie van 2 tot 6 maande goed sosialiseer en mooi leer, staan die spanjoel ‘n beter kans om aan te pas met kinders en mense as die bullterrier met ander honde – sosialisering sal nie sommer die instinktiewe aggressie teenoor ander honde voorkom nie.  Maak egter seker dat julle die hondjie, watter ras ookal, versigtig kies – die ouers se temperament (probeer die ma en die pa ontmoet) en ook die omstandigheide van die teler (bv. gereelde hantering en blootstelling aan normale huislike omstandigheide vanaf 3 weke ouderdom) het ‘n groot invloed op honde se geaardheid.  As julle die spanjoel-roete kies, oorweeg dit dalk om een van die skaarser tipes te kry (bv. English springer spaniel) eerder as die tradisionele Cocker spaniel.