Los stoelgang by klein hondjies

Vraag:
Ons klein hondjies se stoelgang is baie los, veral as hulle Dogmore pille vreet, pap en melk (Oats). Gee raad, asb. - Betz vd Westhuizen (bvdwesthuizen@ppc.co.za)

Antwoord:
Daar is baie oorsake vir los stoelgang in klein hondjies. Dit sluit in dieet, wurms en Giardia ('n protosooïse parasiet wat in die dermkanaal mag voorkom). Die belangrikste oorsaak is dieet. In hierdie geval dink ek die hoofrede is dat die klein hondjies nie 'n gebalanseerde dieet kry nie. Hondjies moet 'n gebalanseerde dieet kry wat spesiaal geformuleer is vir klein hondjies. Klein hondjies moet glad nie pap of melk kry nie. As die hondjies nog te klein is om harde korrels te eet, kan die korrels sag gemaak word deur warm water by te voeg. Ek sal ook aanbeveel dat die werpsel ontwurm word en terselfdertyd vir ander interne parasiete behandel word. 'n Drie dag kursus van Panacur PetPaste (G3614) kan gebruik word.

• Geskryf deur Dr. Carolyn Chelchinskey

  6 Desember 2006